రోజూ అన్నం తింటూ బరువు తగ్గొచ్చా? అధ్యయనం ఏం చెబుతోందంటే..!

బరువు తగ్గాలనుకుంటే చాలామంది ముందుగా అన్నాన్ని మానేస్తారు. అన్నమే బరువు పెరగడానికి ప్రధాన కారణమని భావిస్తుంటారు. కానీ అది పూర్తిగా నిజం కాదని తాజా పరిశోధనలు చెబుతున్నాయి. బరువు తగ్గడంలో కీలక పాత్ర పోషించేది అన్నం కాదు.. రోజంతా తీసుకునే మొత్తం క్యాలరీలు, ఆహార పరిమాణం, జీవనశైలేనని నిపుణులు స్పష్టం చేస్తున్నారు.

జర్నల్‌ ఆఫ్‌ న్యూట్రిషన్‌ అండ్‌ ఫుడ్‌ సైన్స్, ఏషియన్‌ జర్నల్‌ ఆఫ్‌ న్యూట్రిషన్‌ అండ్‌ ఫుడ్‌ సైన్స్‌లో ప్రచురితమైన పరిశోధనల ప్రకారం.. ఒకే ఆహార పదార్థాన్ని పూర్తిగా మానేయడం వల్ల కాకుండా సమతుల ఆహారం, క్యాలరీల నియంత్రణ వల్లే బరువు తగ్గే అవకాశం ఎక్కువగా ఉంటుంది.

తెల్ల బియ్యం కాంప్లెక్స్‌ కార్బోహైడ్రేట్లకు మంచి వనరు. అయితే అవసరానికి మించి తినడమే బరువు పెరగడానికి కారణమని నిపుణులు చెబుతున్నారు. ఉడికించిన ఒక కప్పు తెల్ల అన్నంలో సుమారు 130 క్యాలరీలు ఉంటాయి. కాబట్టి రోజంతా తీసుకునే క్యాలరీల్లో అన్నం వాటాను లెక్కలోకి తీసుకుంటే బరువు నియంత్రణ సులభమవుతుంది.

భారత వైద్య పరిశోధన మండలి (ఐసీఎంఆర్‌), జాతీయ పోషకాహార సంస్థ (ఎన్‌ఐఎన్‌) సూచనల ప్రకారం రోజువారీ క్యాలరీల అవసరం వయసు, లింగం, బరువు, శారీరక శ్రమపై ఆధారపడి ఉంటుంది. సగటున 65 కిలోల బరువు ఉన్న పురుషుడికి రోజుకు 2,110 క్యాలరీలు, అదే బరువు ఉన్న మహిళకు 1,660 క్యాలరీలు అవసరమవుతాయి. ఎక్కువ శారీరక శ్రమ చేసే వారికి ఈ అవసరం మరింత పెరుగుతుంది.

నిపుణుల అభిప్రాయం ప్రకారం బరువు తగ్గే ప్రయత్నంలో రోజుకు అర కప్పు నుంచి ఒక కప్పు వరకు ఉడికించిన అన్నం తీసుకోవచ్చు. అయితే దానితో పాటు పప్పు, శనగలు, రాజ్మా, గుడ్లు, చేప, చికెన్‌, పనీర్‌ వంటి ప్రోటీన్‌ ఆహారం తప్పనిసరిగా ఉండాలి. అలాగే ప్లేట్‌లో సగభాగం కూరగాయలు ఉండేలా చూసుకోవాలని సూచిస్తున్నారు.

అన్నంతో పాటు ఎక్కువగా వేయించిన పదార్థాలు తినడం, మళ్లీ మళ్లీ వడ్డించుకోవడం, చక్కెర ఎక్కువగా ఉండే శీతల పానీయాలు తీసుకోవడం, ప్రొటీన్‌ను నిర్లక్ష్యం చేయడం వంటి అలవాట్లు బరువు తగ్గడాన్ని అడ్డుకుంటాయని హెచ్చరిస్తున్నారు.

చేతితో దంచిన బియ్యం, పులియబెట్టిన అన్నం ఆరోగ్యానికి మేలు చేస్తాయని పరిశోధనలు సూచిస్తున్నాయి. బ్రౌన్‌ రైస్‌, రెడ్‌ రైస్‌, బ్లాక్‌ రైస్‌ వంటి రకాలు కొందరికి జీర్ణ సమస్యలు కలిగించే అవకాశం ఉండటంతో శరీరానికి అనుకూలంగా ఉంటేనే తీసుకోవాలని నిపుణులు సూచిస్తున్నారు.

బరువు తగ్గాలంటే అన్నాన్ని పూర్తిగా మానేయాల్సిన అవసరం లేదని, పరిమిత మోతాదు, సమతుల ఆహారం, క్రమం తప్పని వ్యాయామం ఉంటే రోజూ అన్నం తిన్నా బరువు తగ్గొచ్చని నిపుణులు స్పష్టం చేస్తున్నారు.

గమనిక: ఈ సమాచారం సాధారణ అవగాహన కోసం మాత్రమే. వ్యక్తిగత ఆరోగ్య పరిస్థితులు, పోషక అవసరాలకు అనుగుణంగా ఆహారంలో మార్పులు చేసేముందు వైద్యుడు లేదా పోషకాహార నిపుణుల సలహా తీసుకోవడం మంచిది.